surah087

سَبِّحِ ٱسْمَ رَبِّكَ ٱلْأَعْلَى١

Səbbihi smə rəbbikəl ə'la

Ən üstün və uca olan Rəbbinin adını pak və müqəddəs tut! (Dillə Onun paklığına sitayiş et, qəlblə Onu hər bir eyb və nöqsandan pak bil, və Ona məxsus adları Ondan başqasına aid etmə, o adları təhrif etmə və nalayiq yozumlar etmə.)

ٱلَّذِى خَلَقَ فَسَوَّىٰ٢

Əlləzi xələqə fəsəvva

O kəs ki, (hər bir varlığı) xəlq etdi və (onun tərkib hissələrini yaradılışındakı əsl məqsədə uyğun olaraq) qaydaya saldı (nizamladı).

وَٱلَّذِى قَدَّرَ فَهَدَىٰ٣

Valləzi qəddərə fəhəda

Və o kəs ki, (hər bir məxluq üçün kəmiyyət və keyfiyyət baxımından) bir əndazə (ölçü) qoydu, beləliklə də (onları öz kamilliklərinə doğru) yönəltdi.

وَٱلَّذِىٓ أَخْرَجَ ٱلْمَرْعَىٰ٤

Valləzi əxrəcəl mər'a

O kəs ki, (yerin köksündən) otlaq çıxartdı.

فَجَعَلَهُۥ غُثَآءً أَحْوَىٰ٥

Fəcə'ələhu ğusa`ən əhva

(Al-əlvan rənglərə boyandıqdan) sonra onu qara rəngli quru çör-çöpə döndərdi.

سَنُقْرِئُكَ فَلَا تَنسَىٰٓ٦

Sənuqri`ukə fəla tənsa

(Ya Peyğəmbər!) Tezliklə sənə (bütün Quranı – əzəli elmdə və Lövhi-Məhfuzda olan əsl tənzimi ilə) oxudarıq, belə ki, əsla unutmazsan.

إِلَّا مَا شَآءَ ٱللَّهُ‌ۚ إِنَّهُۥ يَعْلَمُ ٱلْجَهْرَ وَمَا يَخْفَىٰ٧

Illa ma şa əllah, innəhu yə`ləmul cəhrə və ma yəxfa

Allahın istədiyindən başqa (ki, əsla istəməz də, lakin Onun qüdrəti daim məhfuzdur), həqiqətən, O, aşkar olanı da, gizli olanı da bilir.

وَنُيَسِّرُكَ لِلْيُسْرَىٰ٨

Vənuyəssirukə lilyusra

Və səni (dəvətdə və hidayətdə olan) ən asan yol üçün hazır və müyəssər edərik.

فَذَكِّرْ إِن نَّفَعَتِ ٱلذِّكْرَىٰ٩

Fəzəkkir in-nəfə'ətiz zikra

Əgər öyüd - nəsihət fayda verəcəksə (onlara) öyüd-nəsihət ver,

سَيَذَّكَّرُ مَن يَخْشَىٰ١٠

Səyəzzəkkəru mən yəxşa

(Allahdan) qorxmaq qabiliyyətinə malik olan şəxs tezliklə öyüd-nəsihət alacaqdır.

وَيَتَجَنَّبُهَا ٱلْأَشْقَى١١

Vəyətəcənnəbuhal əşqa

Ən bədbəxt şəxs (və Allahdan qorxmayan), ondan (öyüd-nəsihətdən) uzaqlaşar.

ٱلَّذِى يَصْلَى ٱلنَّارَ ٱلْكُبْرَىٰ١٢

Əlləzi yəslan narəl kubra

O kəs ki, ən böyük oda girəcək və yanacaqdır.

ثُمَّ لَا يَمُوتُ فِيهَا وَلَا يَحْيَىٰ١٣

Summə la yəmutu fiha və la yəhya

Sonra isə orada nə (həqiqətən,) öləcək və nə də (rahat) yaşayacaqdır.

قَدْ أَفْلَحَ مَن تَزَكَّىٰ١٤

Qəd əfləhə mən təzəkka

Həqiqətən, nicat tapdı (o kəs) ki, özünü (fəsadlı əqidələrdən, əxlaqi rəzalətlərdən və çirkin əməllərdən) pak etdi, təkamülə yetişdi və zəkat verdi

وَذَكَرَ ٱسْمَ رَبِّهِۦ فَصَلَّىٰ١٥

Vəzəkərə smə rəbbihi fəsalla

Və öz Rəbbinin adını zikr etdi və namaz qıldı.

بَلْ تُؤْثِرُونَ ٱلْحَيَوٲةَ ٱلدُّنْيَا١٦

Bəl tu`sirunəl həyatəd dunya

Lakin (siz o nicatın sorağına getmirsiniz), əksinə, siz dünya həyatını üstün tutursunuz.

وَٱلْأَخِرَةُ خَيْرٌ وَأَبْقَىٰٓ١٧

Vəl axirətu xəyrun və`əbqa

Halbuki axirət daha xeyirli və daha baqidir.

إِنَّ هَـٰذَا لَفِى ٱلصُّحُفِ ٱلْأُولَىٰ١٨

Innə haza ləfis suhufil ula

Həqiqətən, bu (deyilənlər: mənəvi paklıq və nicat, öyüd-nəsihət və namaz, dünyanı axirətdən üstün tutma) bütün keçmiş səmavi kitablarda yazılmışdır.

صُحُفِ إِبْرَٲهِيمَ وَمُوسَىٰ١٩

Suhufi ibrahimə vəmusa

İbrahimin və Musanın kitablarında.